Mitologia Origem Ilha (Island) Timor





Illa Timor mai husi Lafaek

Ilha (Island) Timor nia luan mais ou menus 30.777 km², hafatin iha parte norte Austrália (Darwin) no parte sul Indonésia. Hahún ba istoria politica, ilha ida nee hafahe ba pedasuk rua durante tinan atus ba atus tambá konsekuensia husi colonialismo. Liu husi akordu Lisboa iha tinan 1859, Olanda ho Português halo akordu katak Olanda ukun ilha Timor parte oeste no Português mak ukun parte leste. Agora Timor Oeste ka uluk hanaran Timor Olanda too tinan 1949, sai ona província Nusa Tenggara Timur – Indonésia, no Timor-Leste neebe uluk hanaran Timor Português too tinan 1975, sai mos hanesan parte ida husi Indonésia too tinan 1999, iha tinan 2002 sai nudar nasaun independenti ida hanaran “Republica Democrática de Timor-Leste“. Maske nunee, tuir legenda katak sociedade iha Ilha Timor, aleinde parte Oeste ka Leste mai husi orijin Kultura (Huun ho Rohan) ida deit antes imperialismo tama, katak; Ilha Timor mai husi Lafaek (Crocodylidae) neebe nakfilak aan sai Ilha ida.

Deskrisaun primeiru konaba forma ilha Timor neebe naruk no buat seluk tan hanesan ejistensia habitante, komersiu no okupasaun liurai sira nian, halo husi ema militar ida ho naran Antonio Pigaffeta ho roo Victoria, momentu lao liu husi Tasi feto (Leste ba oeste) iha tinan 1522, neebe hanesan uniku roo restu husi roo funu lima Magalhães nian neebe travadu husi Sevilha Espanhol, ho objetivu ba Maluku no susesu fila hikas ba Espanhol. Ho ida nee ema hahu hatene ilha Timor iha estória komersiu tempu pasadu nian, hafoin ida nee Olanda ho Português komesa hadau malu atu dumina riku soin principal iha ilha ida nee, hanesan ai-kameli.

Iha parte seluk iha mos legenda konaba ilha Timor ka mitologia ilha Lafaek. Educacionalmente mosu livru ho titulu “Istoria povu husi Timor-Leste” (Cerita Rakyat dari Timor-Timur), kriasaun husi Nyoman Suarjana, tinan 1993. Livru nee hakerek konaba “Legenda Mosu Ilha Timor” (Legenda Terjadinya Pulau Timor), istoria refere konta konaba Labarik mane ida iha Maksar neebe hetan Lafaek oan ida wainhira lafaek nee buka nia tabuk la hetan no loro iis habai halo nia isin lolon tomak manas teb-tebes tambá momentu neeba bailoro. Lafaek oan nee besik atu mate, tambá senti hanoin nia mos hetan tulun husi labarik mane, hodi lori nia ba husik iha debu ninin, ikus mai nia vida konsege salva. Hafoin lafaek oan hateten nunee; hahuu ohin ita promete sai amigu diak. Kualker lafaek ida sei la istraga ó. Se ó hakarak halimar iha bee ka tasi, bolu deit no hateten nunee; “hai belun lafaek oan selu hikas hau nia laran diak”, hau seu haruka ó tuur iha hau kotuk no ita sei pasiar ba fatin neebe ó hakarak. Hafoin buat nee mos akontese duni nunee, lafaek sempre lori labarik mane nani ba mai, no luku ba tasi kidun hodi hare furak tasi okos nian. Hahalok hanesan nee sira halo bei-beik. Iha tempu ida, lafaek senti kole no baruk teb-tebes, tamba labarik mane tuur bebeik iha lafaek oan nia kotuk, mak mosu hanoin aat atu haan labarik mane nee. Antes nia atu haan, nia husu uluk hanoin husi animal tasi sira hanesan ikan no rai maran hanesan lekirauk, animal hirak nee la aseita buat neebe nia atu halo, tamba buat diak labele selu ho buat aat. Lafaek nee arrepende teb-tebes tambá hanoit aat ba nia belun diak.

Iha loron ida sira nain rua lao pasiar iha tasi Timor nian agora, lafaek hateten; belun diak, buat neebe o halo hau selu labele. Hau moe teb-tebes tambá hanoin aat ba ó. Agora hau nia vida besik remata ona, hau nia isin sei sai rai. Rai nee sei sai luan teb-tebes, hau espera o, o nia oan, bei oan no o nia jerasaun bele goja hau nia riku soin barak hanesan tusan ba buat diak neebe o halo ba hau. Hafoin lafaek nee mate, nia isin neineik-neineik nakfilak sai rai tetuk. Lafaeik nia kotuk neebe nakonu ho meik, nakfilak sai foho neebe forma husi loro-sae too loro-monu.

Maibe iha mos versaun seluk husi istoria refere neebe hateten katak; labarik mane nee, sai idade boot ona hafoin hasoru malu hikas ho lafaek neebe amenta boot mos. Lafaek konvida joven nee tuur iha nia kotuk hodi pasiar iha tasi laran. Sira sempre halo ida nee bei-beik too joven nee harii uma-kain iha feen no oan, lafaek nee mak proteze familia nee tomak. Wainhira lafaek tempu too atu mate, nia husu ba joven nee ho nia familia tomak hodi hateten katak; hau sei mate no hau nia isin sei nakfilak sai ilha ida neebe o ho o nia família tomak hodi hela no hela para sempre. Mak lafaek isin ho ne-neik nakfilak aan sai ilha ida neebe ikus mai hodi ema hela ba.

Too agora cultura bei-ala povu Timor nian konsidera lafaek hanesan avo neebe sei proteze no kuidadu sira. Aleinde nee mos sei iha tan versaun istroria seluk neebe la hanesan, maibe nia essencial  nee ida deit katak Lafek halo belun ho Ema moris. Istoria hirak nee sai populer ba labarik sira liu husi livru no programasaun radio labarik nian, hanesan vontade atu eduka karater labarik sira nian katak tuir lolos laran diak tenke selu ho laran diak mos no ema hotu la aseita laran neebe aat. Consequentemente lafaek sai animal neebe sagradu, nunee mos iha istoria balun neebe hateten katak; labele kasa lafaek, labele oho no haan naan lafaek. Ema Timor considera katak lafaek hanesan jerasaun avo bei-ala sira. Se lafaek tata ema ruma, sira considera katak ema nee “ibun sala” significa halo buat aat ruma ou avo bei-ala mak foo kastigu ka malisan. Lafaek ikus mai halo mos hanesan totem neebe manifesta forsa kósmika lulik nian. Sira respeitu animal totem nee no labele hakanek nia, haterus nia ka oho nia. Konseitu ba animal totem nee  moris iha tradisaun Lisan neebe integra iha jerasaun ba jerasaun husi avo bei-ala no lisan hotu-hotu iha Timor fiar.

Laos iha Timor deit mak fiar katak lafaek mak origem avo bei-ala sira nian, maibe iha Lembata, Flores parte leste mos fiar hanesan. Hare ba istoria neebe menciona iha leten, neebe hatete katak orijin ema Timor mai husi Makasar, maibe dalaruma mitolijia ida nee mai husi Tradisaun Gowa (Makasar) hodi buras no habelar iha Timor-Leste, tambá tempu neeba Tradisaun Gowa mos iha istoria konaba Mitolojia Lafaek. Istoria konaba ilha neebe mai husi lafaek nee sai internacionalmente, ema sempre konta ba labarik sira antes toba. Dalaruma depois lee tiha istoria lafaek nee hodi sai inspirasaun ba ema ilustrador ida husi Portimão – Portugal, naran Luis Peres neebe mos hakerek konaba Timor Island – Crocodile version (2009) ba livru istoria labarik nian. Ilustrsaun nee haforsa naran neebe temi katak Ilha Timor hanesan The Land of The Sleeping Crocodile ka rai neebe lafaek toba para sempre. Iha mos debate balu neebe hatete katak lafaek nia ulun iha Oeste (Kupaung) no ikun iha leste (Lautem) ka kontrariu, maibe kestaun nee la hamenus fiar populasaun Timor nian ba mitolojia ilha lafaek nee.

Iha artigu balu neebe hakerek husi Anne Lombard – Jourdan ho titulo François Péron no Charles Lesueur, Kasa Lafaek iha Timor Tinan 1803 neebe hatama iha jornal Archipel hodi konta istoria konaba ejistensia kasador lafaek iha Ilha Timor. Artigu nee koalia katak; iha sekulo 17, tasi ibun ilha Timor iha tempu kalan, nakonu ho lafaek neebe wain teb-tebes iha mota ain no mota ibun sira, dalaruma lafaek bele nakonu too alfanik ka marina sira nia fatin no mos uma kain hirak neebe hela besik mota ninin. No mos istoria balu konaba Lafaek haan ema neebe nani. Tuir artigu hirak nee katak; populasaun Timor tauk teb-tebes lafaek too sira adora no considera hanesan Monster fuik. Iha tempu uluk liu ba, kuandu iha kontradisaun ruma entre populasaun, entaun atu hatene parte neebe loos no tuir ordem liu-rai nian, ema nain rua nee sei haruka luku iha bee neebe nakonu ho lafaek, ida neebe mak bela sai hikas husi bee laran nia mak loos. Iha tempu neeba kasador Eropa hakarak kaer lafaek, ema Timor la kohi ajuda, maibe kasador sira obriga no ameasa atu tiru mate populasaun see wainhira kasador la akompaña husi Timor oan sira. Ikus mai sira konsege tiru lafaek ida iha Babau (kupaung) hafoin nia ruin lori ba iha França ba interesse piskiza nian. Tuir inskrisaun katak; lafaek iha tempu neeba nia naruk bele hetan metru 8,25 too 12, tambá la kasa no la oho entaun lafaek iha tempu nee boot liu kompara ho agora.

Conforme fonte iha leten katak, lafaek nia naruk bele hetan metru 8,25 too 12, ida nee realidade ka lae, tambá tempu agora uniku iha lafaek jigante ida deit iha ilha Mindanao (Filipina), nia naruk metru 6,17 no todan iha tonelada ida neebe sura ona hanesan reptil boot liu iha Mundu husi Guinness Book of World Records (2012). Antes nee reptil boot liu iha Mundu maka lafaek neebe kaer iha área Northeen Territory (Australia) besik ilha Timor iha tinan 1984, naruk metru 5,48 no todan besik tonelada ida. Too agora kada tasi ibun ilha Timor, sei iha nafatin lafaek.



Inspirasaun Arte no Dezenvolvimentu

Iha dezenvolvimentu, mitologia ilha lafaek nee sai inspirasaun arte ba populasaun iha ilha Timor, hanesan animal totem neebe halo sai sagradu, sira expressa lafaek iha kontestu sasan cultura neebe hatudu relasaun entre povu Timor agora ho sira nia avo bei-ala. Hahalok hanesan ida nee bele hare husi motivu iha imajen ka estátua ou tais. Hanesan sumasu ka biti balu neebe iha pintura lafaek, hanesan motivu sakunar neebe mai husi Niki-Niki área Timor klaran Súl, Timor Oeste no motivu fauna lafaek iha tais no estátua husi Timor-Leste.

Laos lafaek deit mak halo sai sagradu iha comunidade Timor, iha mos animal rai maran no ai leten balu neebe povu Timor fiar hanesan representante husi lafaek inklui Teki (Cosymbotus platyurus), Toke (Gekko gecko) no Lafaek rai maran. Susar ba ema sira neebe hakanek animal hirak nee, tambá tuir sira nia konsiderasaun katak animal hirak nee lori salvasaun ba sira, se família iha uma kain ida dada-lia hela, wainhira rona teki lian, entaun dada-lia ida nee sei lori susar no lori salvasaun katak buat neebe koalia dau-daun iha impaktu diak. Nunee mos wainhira iha toke neebe tama ba uma laran, ema sira sei la duni no husik nia moris iha uma laran, tambá considera bele foo matak malirin. Hanoin katak buat hirak nee povu sira sei kaer metin ou tuir tempu neebe lao, mitologia konaba ilha Timor komesa lekon ho neneik, tambá racionalidade povu nian neebe makaas. Maka nee deit mitologia konaba ilha Timor no nia impaktu iha comunidade ilha Timor nia moris. Obrigadu.

Hare ba istoria refere ita nota katak; Populasaun Timor nia origem lolos mai husi Rai Makasar, maibe iha mos versaun balun husi Loro-sae Timor-Leste nian, neebe hateten katak; Timor divide ba parte tolu, hanesan Loro-sae, Rai-klaran no Loro-monu. Nee tambá iha tempu uluk liu ba, iha Oan mane nain tolu husi Rai-klaran husi Uma Lisan Katuas no Ferik, sira nain tolu deside atu hela keta-ketak, ho ida nee mak, ida oan mane boot ba hela iha Loro-sae, oan mane klaran nafatin iha Rai-klaran no oan mane ikun ba hela iha Loro-monu. Ikus mai jerasaun husi oan mane boot nian, balu sai husi Loro-sae ba hela iha Rai Maksar.

Konaba ilha Timor nia origem, husi parte siensia sei sai duvida, tuir analiza peskizador sira nian neebe iha hatudu katak; espécies sira hanesan ai-horis, animal no fatuk neebe hela iha ilha nee nia leten, maioria atu hanesan espécies iha tasi laran nian, ho ida nee peskizador sira hola konkluzaun katak; dalaruma ilha Timor nee uluk iha tasi nia okos, tambá hetan presaun vulkanika iha Austrália, mak hodi hamosu ka dudu sae Ilha nee husi tasi okos mai.